ЖАСТАРҒА «ЖАЙЛЫ УНИВЕРСИТЕТ» ЖАСАҚТАЛУДА

16 Қаңтар 2025, 12:15

Медиа Орталық

Өзбекәлі Жәнібеков атындағы ОҚПУ Басқарма төрағасы-ректор міндетін атқарушы Гүлжан Сүгірбаева оқу ғимараттарын аралап, инфрақұрылым, материалды-техникалық база мен техникалық қауіпсіздік жұмыстарымен танысты.

Университеттің «Тұмар» ғаимаратында бүгінде «Өнер және білім», «Филология» факультеттері мен Жүсіпбек Аймауытов атындағы колледж студенттері дәріс алады. Жаңа оқу жылында болашақ маман иелеріне арнап 10 дана тігін машинасы, 3 автоматты бу үтігі, кесте тігетін автоматты машина сатып алынды. Ағаш пен металлды механикалық жолмен өңдеуге арналған дәнекерлеуші станоктар жеткілікті.

— Болашақта студенттермен өзін-өзі қамтамасыз ету бағытында көрме ұйымдастыратын жобаны жүзеге асырмақпыз. Онда қолөнер бұйымдары сатылады. Дизайн мамандығының студенттері 5 жыл оқиды. Жасалған жағдайдың арқасында бүгінде жастарымыз бәсекеге қабілетті, еңбек нарығында сұранысқа ие болып отыр. Нақты дәлел келтірейін, 4-курстың өзінде болашақ дизайнерлеріміз 100 пайыз жұмыс істейді. Түске дейін сабақ оқыса, түстен кейін алған білімдерін жұмыс орнында тәжірибемен ұштастырып, екіншіден, отбасыларына қаржылай көмектесіп, оқу ақыларын өтей алады, - дейді факультет деканы Айдайқыз Байбатшаева. Ал, жаңадан көбейтіліп жатқан лэд-экрандар арқылы графикалық компьютерлік техника пәндері қызықты өтуде.

Басқарма төрағасы бұдан кейін университеттің әскери кафедра ғимаратындағы жаңа өзгерістермен танысты. Сала проректорлары мен декандарға, кафедра басшысына техникалық ережелерді қатаң сақтау, бос бөлмелерді оқытушылар игілігіне жарату сияқты бірқатар тапсырмалар берді.