Өзбекәлі Жәнібеков атындағы ОҚПУ Басқарма төрағасы-ректор міндетін атқарушы Гүлжан Сүгірбаева студенттермен кездесті. Шараның мақсаты — білімгерлермен ашық байланыс орнату, олардың мәселесін тыңдау және білікті тарихшы ретінде кәсіби бағдар беруге арналды.

Кездесуді ұйымдастырған тарих және педагогика факультетінің студенттері Гүлжан Дәулетбекқызының өмірбаяны мен қызметіне байланысты биографиялық видеороликті назарға ұсынды. Ректор бұдан кейін тарих мамандығын не үшін таңдағаны, университетте оқу сапасы мен тәрбиені, жастарға жағдай жасауды жақсарту жөніндегі стратегиялық жоспарларын бөлісті. Студенттердің сұранысымен археологиялық қазба жұмыстары кезінде орын алған қызықты естеліктерін әңгімелеп, оқу орнында өткен жастық шағына ойша саяхат жасады.

— Қазақ өзі табиғатынан ағартушы, дана халық. Қазір педагог мамандығының мәртебесі артты. Білсеңіздер, біздің университет өңірде тұңғыш құрылған оқу орны. Сондықтан, біз әрдайым барлық жағынан бірінші орында болуымыз қажет, —деп студенттерді серпілтті. Болашақ тарихшыларға «100 жыл өтпей жатып тарихи оқиғаға баға беруге болмайды» деген кәсіби кеңес берді. Сұрақтар қойып, естелікке суретке түскен жастар «Жақсымен өткізген жарты сағат, жаманның өтіп кеткен ғұмырындай» деп, кездесуден алған әсерлерін жасыра алмады.