Бұрымыңды жи, бойжеткен!

3 Қазан 2024, 14:23

Медиа Орталық

Өзбекәлі Жәнібеков атындағы ОҚПУ тарих және педагогика факультетінің деканы Гүлдариға Таутаева студенттерге арнап тәрбие сабағын өткізді.

—Халық педагогикасына тәрбиенің түп төркіні ретінде қарасақ, болашақ ұстаздарға бұл ойланарлық мәселе. «Шашының ұзындығы ізін басты» немесе «Қыпша бел, қиылған қас, қолаң шашты» деген тіркестер халық арасында кең таралып, бойжеткенді сұлулыққа, жинақылыққа, эстетикалық талғамның жоғарылығына тәрбиелеген, — деген ол бойжеткендерді бұрымын жинап жүруге шақырды. Қыздардың шашын жайып жүруін әжелеріміз жаман ырымға балаған. «Қазақта әйел тек күйеуі қайтыс болғанда шашын жайып жылаған. Әйелдер жоқтау айтып жылағанда шашын жайып жіберіп жыласа, ішіндегі шері тарқайды деп ырымдаған. Қазір қайда қарасаң да шашын жайған қазақтың қызын көресің. Үйде анасы, түзде ұстазы айтып отырмаса, кейбір жастар оның мәнісін білмейді» дейді декан.

Іс-шара ұйымдастырушылар университет аруларынан осы бастамаға орай қолдау күтеді. Ол үшін студент қыздар шашын өріп немесе жинақы сәндесе жеткілікті.