Өзбекәлі Жәнібеков атындағы Оңтүстік Қазақстан педагогикалық университетінде мемлекет және қоғам қайраткері, экономика ғылымдарының докторы, профессор, ҚР ҰҒА академигі, ҚР мемлекеттік сыйлығының лауреаты, Өзбекәлі Жәнібеков атындағы ОҚПУ Директорлар кеңесінің төрағасы Сәбден Оразалы Сәбденұлы ашық дәріс оқыды.
Баяндама тақырыбын «Әлем, Абай, Қазақстанның сара жолы» тақырыбына арнаған Оразалы Сәбденұлы қазіргі әлемдік бетбұрыста еліміздің алатын орны мен шығатын тұғыры туралы кеңінен ой толғады. Қазақстанның сара жолының тетіктері туралы сөз қозғаған спикер Мемлекет басшысы Қасым-Жомарт Тоқаевтың Қазақстан халқына арнаған Жолдауымен байланыстырды.
Адамзаттың алыбы саналатын Абай Құнанбаев шығармаларының қоғамды ізгілендіруге әсерін, Қазақстандағы экологиялық проблемаларды ортаға салып, қатысушылар мен студенттер сұрақтарына жауап берді. Журналистермен тұшымды ой бөлісті.
Ашық дәрісті университет Басқарма төрағасы-ректор міндетін уақытша атқарушы Гүлжан Сүгірбаева жүргізіп отырды.