14 ақпан – Халықаралық кітап сыйлау күні аясында Жәнібеков университетінде дәстүрге айналған «Жәнібеков университетінің кітап фестивалі» өтті.

Биыл руханият мерекесіне айналған айтулы шараға 6 жыл толып отыр. Алты жылдан бері жалғасын тауып келе жатқан игі бастама – білім мен парасаттың, кітапқа деген құрметтің жарқын көрінісі.

Кітап сыйлау блиц-акциясы барысында профессор-оқытушылар құрамы мен қызметкерлер, білім алушы жастар бір-біріне кітап тарту етіп, ой-пікір бөлісті. Бұл – жай ғана сый алмасу емес, рухани сабақтастықтың белгісі.

Фестивальдің ашылуында Басқарма мүшесі – Стратегиялық даму және әлеуметтік істер жөніндегі проректор Баршагүл Исабек ізгі тілегін білдіріп, кітаптың қоғам дамуындағы маңызын ерекше атап өтті. Проректор сондай-ақ университеттің кітапхана қорына өз атынан Шымкент қаласының тарихына арналған жинақты тарту етсе, әріптестеріне жекелей кітап сыйлады.

Іс-шара аясында «Атамұра» корпорациясы, «Қасым» кітап дүкені, «Отбасы хрестоматиясы» баспасы өз өнімдерін көпшілікке ұсынды. Сондай-ақ, Шымкент қаласындағы ЖОО-лардың белсенді жастары қатысып, фестивальдің мазмұнын байытып, мерекелік көңіл-күй сыйлады.