Өзбекәлі Жәнібеков атындағы ОҚПУ-ға Abertay University (Данди, Шотландия, Ұлыбритания) делегациясы келді. Делегацияны университет Басқарма төрағасы-Ректор Қайрат Балабиев қабылдап, кездесуге Басқарма мүшелері – проректорлар мен Интернационалдандыру департаментінің өкілдері қатысты.

Кездесу барысында тараптар академиялық және ғылыми ынтымақтастықты кеңейту мәселелерін талқылап, әріптестіктің үш басым бағытын айқындады. Оның алғашқысы киберқауіпсіздік бойынша қос дипломды білім беру бағдарламасын әзірлеу болса, екіншісі РhD докторанттарын бірлесіп даярлау және ғылыми тағылымдамалар ұйымдастыру. Ал , үшінші мәселеде ұзақ мерзімді институционалдық әріптестікті дамыту талқыланды.

Тараптар алдағы жұмыстың нақты жоспарын әзірлеп, өзара түсіністік туралы меморандумға қол қоюға дайындықты жалғастыруға келісті. Кездесудің мақсаты – қажетті келісу рәсімдерінен өтіп, 2027 жылғы 1 қыркүйектен бастап киберқауіпсіздік бойынша қос дипломды білім беру бағдарламасын іске қосуға жағдай жасау болды.