ҚАУЫМДАСТЫРЫЛҒАН ПРОФЕССОР АТАҒЫ БЕРІЛДІ !

17 Наурыз 2025, 14:24

Медиа Орталық

Zhanibekov University физика-математика факультетінің деканы, педагогика ғылымдарының кандидаты, доцент м.а Альмира Ибашоваға 50300- Білім бағыты бойынша қауымдастырылған профессор (доцент) ғылыми атағы берілді! Ғылыми атақ ҚР Ғылым және жоғары білім министрлігі Ғылым және жоғары білім саласында сапаны қамтамасыз ету төрағасының 2025 жылғы 13 наурыздағы 379-бұйрығына сәйкес берілді.

Альмира Байдабекқызы 1969 жылы Түркістан облысы, Бөген ауданы, Қараспан ауылында педагогтар отбасында дүниеге келген. Алғашқы еңбек жолын информатика мұғалімі қызметінен бастады. Ол ҚР Президенті Қ.Тоқаевтың Қазақстан халқына арнаған Жолдауындағы «500 ғалым» жобасы бойынша 2022 жылғы «Болашақ» стипендия иегері. «ҚР ғылымын дамытуға сіңірген еңбегі үшін» төсбелгі иегері. Бастауыш мектептерде ақпараттық білім ортасын әзірлеуге арналған жобалары мемлекеттік гранттық қаржыландыру негізінде нәтижелі мақсатқа жетті.

Өз ісінің білікті маманы 2017 жылдан «Физика-математика» факультетінің деканы. Халықаралық, республикалық ғылыми-практикалық конференцияларға қатысып, баяндамалар жасап тұрады. Оның 60 ғылыми мақаласы отандық және шетел басылымдарында жарияланған, 6 оқу және оқу-әдістемелік құралдарының авторы. Альмира Байдабекқызы Ө.Жәнібеков атындағы ОҚПУ-де былтыр тұңғыш рет құрылған 8D01503 – «Информатика педагогін даярлау» білім беру бағдарламасы бойынша диссертациялық кеңестің төрағасы. Жақында ғана оның жетекшілігімен Д.Белесова «Бастауыш сынып оқушыларын программалауға оқытудың ғылыми-әдістемелік негіздері» тақырыбындағы диссертациясын қорғап, 8D01503 – «Информатика педагогін даярлау» білім беру бағдарламасы бойынша философия докторы (РhD) дәрежесін иеленген болатын.